पाल्पा जिल्लामा पछिल्लो समय धान उत्पादनमा वृद्धि भएको छ । कृषकहरु उन्नत जातको धान खेतीप्रति आकर्षित हुनु, समयमै खेती हुनु, मलखादको पर्याप्त सुविधा हुनु तथा रोग नलाग्नु जस्ता कारणले गर्दा धान उत्पादनमा वृद्धि भएको हो ।

गत वर्षभन्दा यस वर्ष २ हजार मेट्रिक टन धान बढी उत्पादन भएको छ । गत वर्ष जिल्लामा ३३ हजार ८ सय ९६ मेट्रिक टन धान उत्पादन भएकोमा यस वर्ष ३५ हजार ८८ मेट्रिक टन धान उत्पादन भएको वरिष्ठ कृषि विकास अधिकृत किशोरमान श्रेष्ठले जानकारी दिनु भयो ।  जिल्ला कृषि विकास कार्यालयले हरेक वष उन्नत जातको धानको बीउ वितरण गर्दै आएको छ । पछिल्लो समयमा पाल्पाका विभिन्न खेतीयोग्य भू–भागमा स्थानीय जातको धानभन्दा उन्नत र हाइब्रिड जातको धान लगाउने क्रम बढेको छ । माडी, रामपुर, अर्गली, हुँगी, कचल, झडेवा, सत्यवती, गल्धा, पूर्वखोला, रिङ्नेरह जस्ता क्षेत्रमा धानबालीको खेती गरिँदै आएको छ ।