प्रतिनिधिसभा अन्तर्गतको कृषि, सहकारी तथा प्राकृतिक स्रोत समितिले कृषकहरुलाई समयमै मल उपलब्ध गराउन आवश्यक व्यवस्था मिलाउन सरकारलाई निर्देशन दिएको छ । सिंहदरबारमा शुक्रबार बसेको समिति बैठकले मल अभावका बिषयमा कृषिमन्त्री घनश्याम भूषालसंग छलफल गर्दै कृषकहरुलाई समयमा नै मल उपलव्ध गराउन निर्देशन दिएको हो ।

समितिले मल समस्या समाधानका लागि मन्त्रालयले बनाएका अल्पकालिन र दीर्घकालिन योजनाहरु छिटो भन्दा छिटो समितिलाई उपलब्ध गराउन पनि निर्देशन दिएको छ । त्यस्तै बैठकले चालु आर्थिक वर्षमा रासायनिक मल आयात गरिएको मलको परिणाम र वितरणको तयारीका विषयमा विस्तृत विवरण ७ दिनभित्र समितिमा पेश गर्न पनि निर्देशन दिइएको कृषि समिति सभापति पूर्ण कुमारी सुवेदीले जानकारी दिनुभयो । बैठकले मलमा दिएको अनुदानलाई पुनरावलोकन गरी सबै किसानहरुलाई रासायनिक मल अनुदानमा दिन तथा तराई र मध्य पहाडी जिल्लामा गोदाम घरको व्यवस्था गर्न पनि निर्देशन दिईएको उहाले जानकारी दिनुभयो ।

बैठकमा कृषिमन्त्री घनश्याम भूषालले अहिले आवश्यकताका आधारमा किसानहरुलाई मल बितरण भइरहेको जानकारी दिनुभयो । मलको कालाबजारी गर्नेलाई सरकारले कारवाही गरेको उहाले बताउनुभयो । नेपालमा रहेको मलले हालको अभावलाई पूर्ति गर्न नसक्ने भएकाले बंगलादेशबाट मल मगाइएको उहाको भनाई छ ।

बैठकमा समिति सदस्यहरुले हरेक बर्ष कृषकहरुलाई मलको अभाव भएपनि सरकारले पूर्वतयारी गर्न नसकेको आरोप लगाएका थिए । त्यस्तै उनीहरुले मलको कालाबजारीलाई रोक्न सरकार असफल भएको बताएका थिए ।